مقارنة بين محمد صلاح ومحمد أبو تريكة

من كام شهر " صلاح " اخد احسن لاعب في افريقيا ، ولما اتسأل عن حلمه قال انه يكون احسن لاعب في تاريخ مصر
وعجبني رد حسن المستكاوي : اما قال كل جيل وليه ظروفه وليه ابطاله بلاش نقارن بينهم
وبرضه احنا مصممين نقارن " صلاح " ب" ابوتريكة " في الوقت الحالي ونقلل من اسطورة عظيمة بحجم تريكة
هو اه الكلام عمره مهيغير الحقيقة اللي عيشناها ومكنتش عاوز اقارن ابطال واساطير عيشناها ببعض بس تمام نقارنهم بالبطولات والانجازات في ظروف عصرهم بعيدا عن البطولات المحلية اللي بيتفوق فيها ابوتريكة بسنين ضوئية

* ع المستوي القاري مع الاندية :-

- ابو تريكة : 5 دوري ابطال ، 4 كاس السوبر ولعب موسم مع بني ياس حصل معاهم علي بطولة الخليج
- محمد صلاح : لم يحصل علي اي بطولة قارية مع الاندية

- ابوتريكة : افضل لاعب افريقي داخل القارة 4 مرات وهو صاحب الرقم القياسي لها
- صلاح : لعب في افريقيا واوروبا ولم يحصل علي احسن لاعب داخل القارة ولا مرة

- ابوتريكة : جايزة BBC كافضل لاعب في افريقيا 2008 وتم منعه من جائزة الفيفا لسبب سياسي بالاضافة ان وقتها مكنش في نسبة لتصويت الجمهور واللي كانت في صف تريكة جدا " اكبر شعبية في العالم سنتين ورا بعض من قبل الاتحاد الدولي لتاريخ واحصاء كرة القدم "
- محمد صلاح : جايزة BBC والفيفا كافضل لاعب في افريقيا 2017 مع منافسين اقل بكتير من دروجبا وايتو

- ابوتريكة : تم اختياره ضمن افضل 11 لاعب في افريقيا 3 مرات
- محمد صلاح : مرة واحدة

- ابوتريكة : الهداف التاريخي لدوري ابطال افريقيا
- محمد صلاح : لم يتوج بالهداف في اي بطولة قارية

- ابو تريكة : الهداف التاريخي لكاس العالم للاندية وصاحب افضل هدف في تاريخ البطولة وتم اختياره ضمن افضل لاعبي البطولة من الفيفا
- محمد صلاح : لم يصل البطولة ولا مرة

* المنتخب :-
ابو تريكة : 2 كاس امم افريقيا وصاحب هدفي حسم البطولتين
محمد صلاح : 0

ابو تريكة : لعب كاس عالم قارات 2009 وصنع هدفين في واحدة من احسن المباريات في تاريخ مصر قدام البرازيل ، وصنع هدف الفوز قدام بطل العالم ايطاليا وتم اختياره ضمن فريق منتخب القارات
محمد صلاح : لم يلعب البطولة ولا مرة

- ابوتريكة : ضمن المنتخب اللي لعب التصفيات المؤهلة لكاس العالم 2010 المظلوم في عدم الوصول للمونديال بعد الفوز علي الجزائر في مجموع الماتشين
وكان ضمن المنتخب اللي لعب التصفيات المؤهلة لكاس العالم 2014 وفازو في جميع المباريات ذهاب وعودة و للاسف قابلو اقوي منتخب في القارة وقتها وخرجو بفضيحة 6-1
- غانا الفريق الوحيد اللي قدر يتعادل مع المانيا في كاس العالم

محمد صلاح : فرحنا اخيرا بالوصول لكاس للعالم 2018 في اسهل تصفيات في تاريخ مصر
ودي الحاجة الوحيدة اللي صلاح اتفوق فيها علي تريكة

في يناير 2016 تم تصنيف ابوتريكة ضمن قائمة اساطير كرة القدم من قبل الاتحاد الدولي لتاريخ واحصاء كرة القدم

فعرفني انت معتبر صلاح افضل من تريكة ازاي !
- لو علي الوصول لكاس العالم ، رغم اللي وضحته فوق
فاحمد فتحي وصل كاس عالم واخد كاس امم افريقيا للكبار والشباب واخد برونزية كاس عالم شباب للمنتخبات واخد بروزنية كاس عالم للاندية ولعب كاس عالم قارات واترشح لأحسن لاعب في افريقيا ، واخد كل البطولات المحلية والقارية اللي شارك فيها مع ناديه وحسم بطولة رغم انه مدافع ، وبكده فهو احق لاعب نقول عليه افضل لاعب كرة قدم في تاريخ مصر
انا من اول الناس اللي قولت صلاح هينافس علي البالون دور رغم انه بسيط جدا واقل بكتير من ميسي ورونالدو بس الظروف تؤهله للجايزة زي ما الظروف أهلته لاحسن لاعب في افريقيا مع منافسين اقل من منافسين تريكة وصعود كاس عالم في ظروف اسهل كتير من ظروف الجيل الذهبي

الخلاصة لسه بدري علي صلاح فخلينا نعتبره افضل محترف في تاريخ مصر ،و ياريت بلاش تقارنوه بتريكة دلوقت واعتقد قبل مايعتزل بكتير هيكون عدي اي لاعب مصري وعربي وافريقي وبرضه تريكة هيفضل اسطورة القرن بالنسبالنا